أنا إندي هاكات هيلوا ((انا عندي حاجات حلوة))

مرة واحده ست خبطت على باب بيتنا وكانت شايله شنطه على ضهرها اد حجمها اربع مرات.....

انا قلت دي ماما نويل وجايبالي لعب وحجات ..

فتحت الباب بسرعه ورحبت بيها رغم اني كنت شايفها بصعوبه لانها قصيرة اوي

ست ترانزيستور يعني ......لاحظت كمان انها من دول أسيا ....عرفت من عينيها ....حاكم انا افهمها وهي طايره
فقلت ويلكم... ويلكم... حضرتك عايزا مين
قالت "إندي هاجات هيلوه"
رديت وقلت :يا بختك وجبتيها منين؟
قالت من صين بفلوس حبه صغيرين
يا دي النيله دي طلعت عايزه فلوس
لا يا ستي شكرا... انا كمان عايز فلوس حبه صغيرين او اي حبه والسلام
ردت بأصرار غريب :طب هاتي ماما
لا ابوس ايدك كلو الا ماما دي الحاجه الوحيده الي حيلتي ومقدرش اديهالك
زعقت وقالت :هاتي ماماااااا
صراحه انا خفت أصل الجماعه بتوع أسيا دول بيكلو اي حاجه وفي اي وقت يعني معندهمش ياما ارحميني جريت على أمي وبصوت عالي قلت :

يا اماااااااا الحقي في ست من الصين علباب ......

امي ست طيبه وعلى نيتها اول ما شفتها قالت ...........

يا حليله دي أوشين "فاكرين مسلسل اوشين اللي كله نكد"
الست .."إندي هاجات هلوه"
ردت أمي بمنتهى الطيبه: وبتكلم عربي كمان.... انتي تايهه يا اختي ولا ايه
قالت تاني بأصرار "عندي هجات هلوه"
أمي سالتها عندك ايه ؟
بسرعه فتحت الشنطه الي على ضهرها وطلعت منها ستين حاجه ..فكرتني بالعلبه الي فيها فيل

الشنطه كانت مليانه مفارش وبجامات وشباشب وشربات وغيارات المهم ان أمي عجبها شبشب
فسألتها بكام ده يا أوشين
ردت وقالت "خماشر بس"
أمي سمعت كده وراحت مقلعانا شباشبنا ولمتهلها كلها
وقالتلها ياله خديهم الواحد بخمسه بس

و انا إندي هاجات هلوه

وبسسسسسسسسسسسس

********

تحياتي

هاني